ელჩი დუშეთს ეწვია და ახლადარჩეულ მერთან შეხვედრა გამართა
2021 წლის 3 დეკემბერს საქართველოში ლიეტუვის ელჩი ანდრიუს კალინდრა ეწვია დუშეთის მუნიციპალიტეტს და გაცნობითი შეხვედრა გამართა დუშეთის ახალარჩეულ მერთან, მანანა ნარიმანიძესთან.
საუბარი ელჩსა და მერს შორის შეეხო ლიეტუვის საელჩოსა და დუშეთის მუნიციპალიტეტს შორის თანამშრომლობას, რომელიც უკვე ითვლის რამდენიმე წელს და მრავალ ღონისძიებას, ასევე პროექტებს. დუშეთში ჩატარდა არაერთი კულტურული ღონისძიება, რომელიც ლიეტუვის მხარემ წამოაყენა, მათ შორის ფოტო გამოფენები, სამხატვრო გამოფენები, კონცერტები და შემოქმედებითი სემინარები. აღსანიშნავია ისიც, რომ დუშეთი მასპინძლობს ლიეტუვური კულტურის ცენტრს, რომელიც დაარსდა 2017 წელს. საელჩოსა და დუშეთის მუნიციპალიტეტს შორის თანამშრომლობა ეტაპობრივად უფრო წინ მიიწევს, რასაც ხელს შეუწყობს ახალარჩეული მერის და მისი გუნდის მხარდაჭერა.
ვიზიტის დროს ელჩმა, შშმ პირთა საერთაშორისო დღის ფარგლებში დუშეთის მუნიციპალიტეტის სოფელ პირმისაანთკარის შშმ პირთა პანსიონატს საჩუქრად გადასცა საელჩოს დიპლომატებისა და ადმინისტრაციის თანამშრომლების საჩუქარი.
ლიეტუვამ დუშეთის მუნიციპალიტეტში განვითარების თანამშრომლობის რამდენიმე პროექტი განახორციელა, რომელთაგან ყველაზე აღსანიშნავია დევნილთა სოფელ ფრეზეთში განხორციელებული პროექტები. ფრეზეთის კულტურული ცენტრისა და საბავშვო ბაღის დენით მოსამარაგებლად, ლიეტუვური კომპანიების მიერ დამონტაჟდა განახლებადი მზის ენერგიის პანელები ლიეტუვის სამთავრობო ინსტიტუტების ხელშეწყობით. პროექტი ასევე მოიცავდა მსგავსი მზის ენერგიის ქსელების დამონტაჟებას დუშეთის გარეთ მდებარე დევნილთა სოფლებშიც.
დუშეთს აქვს მეგობრობისა და თანამშრომლობის მემორანდუმები ლიეტუვის ქალაქებთან შაკიაისა და პრიენაისთან, რომლებიც მოიცავს ისეთ სფეროებს, როგორიცაა კულტურა, განათლება, სპორტი, ბიზნესი, ტურიზმი და სხვა.
ელჩმა დაადასტურა მზადყოფნა კიდევ უფრო გააძლიეროს თანამშრომლობა დუშეთის მუნიციპალიტეტთან, რითაც შემდგომ წვლილს შეიტანს ხალხთა შორის კონტაქტებში ლიეტუვისა და საქართველოს მუნიციპალიტეტებს შორის.
